A CHMS e ADEGA asinan un convenio que posibilitará a formación de voluntarios ambientais e poñerá en valor a riqueza natural da conca do Miño-Sil

Detalles

Luns, 11 Abril 2016

Este documento instrumenta a entrega dunha subvención de 10.000,00 € para este ano 2016
ADEGA dispón da infraestrutura e dos medios técnicos adecuados, así como da experiencia necesaria en coordinación de voluntarios

O Ministerio de Agricultura, Alimentación e Medio Ambiente, a través da Confederación Hidrográfica do Miño-Sil (CHMS), asina un Convenio de Colaboración coa Asociación Ecoloxista ADEGA, mediante o que se entrega unha subvención de 10.000€ para o desenvolvemento dun programa de formación de voluntariado ambiental e divulgación dos valores naturais asociados á Conca do Miño-Sil.

Este Convenio foi rubricado esta tarde, na sede da CHMS, por Francisco Marín, presidente do organismo de conca; e por Virxinia Rodríguez, presidenta de ADEGA. Ambas as partes comparten o obxectivo común da defensa e promoción da sustentabilidade dos ecosistemas fluviais e consideran de gran importancia levar a cabo conxuntamente o desenvolvemento de diversas actuacións de colaboración e cooperación no ámbito do desenvolvemento sustentable e de educación ambiental.

Tal e como establece a Estratexia Nacional de Restauración de Ríos, é fundamental o fomento da participación cidadá e a implicación dos colectivos sociais na xestión dos sistemas fluviais, a través do que se obtén un aumento da percepción social sobre os problemas asociados ás presións aos ríos, mellora do coñecemento sobre o funcionamento e a dinámica natural dos ríos e o fomento do uso racional do espazo fluvial e o impulso do desenvolvemento sustentable do río e conca vertente.

ADEGA vén desenvolvendo desde hai anos acciones concretas no fomento e mantemento da sustentabilidade dos ríos a través do Proxecto Ríos que ten como finalidade principal dar a coñecer o papel fundamental dos ríos e das súas problemáticas ambientais, así como divulgar prácticas e comportamentos que permitan aos cidadáns o mantemento e mellora dos sistemas fluviais mediante dinámicas que fomenten a súa participación.

Neste sentido a asociacion xa dispón da infraestrutura e dos medios técnicos adecuados, así como da experiencia necesaria en coordinación de voluntarios, consolidando, ao longo dos anos, unha ampla rede de voluntariado que garante unha capacidade de difusión e repercusión das actividades realizadas.

"Desde a CHMS consideramos que a participación e colaboración na formación de voluntarios é fundamental, co ánimo de concienciar á poboación da importancia de contribuír, sobre todo, na conservación das canles, pero tamén na mellora dos ecosistemas fluviais", concluíu Francisco Marín, presidente do organismo de conca.

Descargar PDF